La cocina Delokos é o blog de cociña ovolacto vexetariana e ecolóxica máis importante de Galicia e unha auténtica referencia para tódolos interesados no mundo da cociña vexetariana.
Nun dos seus post escribe sobre o requeixo da Capela, recomendándoo a tódolos seus lectores.
“Os puedo decir que a mí me ha parecido prácticamente igual al que se podía consumir en las casas de forma artesanal. Una textura cremosa, ligeramente granulosa, con un profundo sabor a leche fresca” escribe o seu autor.
A web Nutriguía, dirixida polo médico e master en dietética e nutrición Manuel Zamora, comenta unha viaxe gastronómica polas terras do Eume realizada sen saír de Madrid, no pasado mes de marzo de 2009, grazas á comida organizada no restaurante La Penela, no que os asistentes tiveron a oportunidade de probar o requeixo de Campo Capela.
Sobre a cooperativa din: “Para conocer ‘in situ’ el procedimiento de elaboración de los mejores quesos gallegos, el visitante puede acercarse a la Cooperativa Campo Capela, que utiliza leche cruda de vaca, sin conservantes ni colorante añadidos, para preservar su sabor y calidad. La Cooperativa elabora el riquísimo requeixo da Capela, el queso fresco, queso del país, nata y mantequilla.“
Autora: Beatriz Sotelo. Gañadora do concurso “Cocinero del Año” celebrado en Alimentaria 2008 (Barcelona). Restaurante A Estación (Cambre).
Ingredientes:
Requeixo de A Capela
2 quilos de salmón fresco
500 gramos de azucre moreno
500 gramos de sal gordo
15 gramos de eneldo
1 bote de encurtidos en vinagre (alcaparróns, allo, pepinillo, ceboliñas)
Xerminados frescos
Elaboración do salmón marinado:
Desespiñar o salmón limpándolle ben a graxa.
Unha vez limpo pesar o salmón. Por cada dous quilos de peixe mesturar 500 gramos de azucre moreno, 500 gramos de sal e 15 gramos de eneldo.
Cubrir o salmón con esta mestura e colocalo coa pel cara arriba, cuberto con film plástico. Meter 24 horas na neveira, despois darlle a volta ao salmón e deixar no frío outras 24 horas.
Unha vez pasados os dous días lávase o salmón en abundante auga e somerxese en aceite de xirasol, quedando listo para o consumo.
Elaboración da crema de encurtidos:
Cortar a metade dos encurtidos en paisana fina e a outra metade triturámolos ata que quede unha crema homoxénea.
Montaxe:
No fondo do prato ponse a crema de encurtidos. Córtanse uns tacos pequenos de salmón e sitúanse derriba, poñendo encima os encurtidos cortados en paisana e os xerminados frescos. Ao pe do salmón ponse unha cullerada de requeixo e remátase poñendo sobre o salmón un pouco de aceite de oliva e sal maldon.
Esta receita foi servida por Beatriz Sotelo na comida ofrecida aos participantes en Madrid Fusión 2009
O número de setembro da revista Origen, editada en Madrid e dedicada aos produtos con denominación de orixe ou de especial calidade, dedica un amplo reportaxe á comarca do Eume e as súas producións, entre as que destaca os produtos da Cooperativa Campo Capela.
A reportaxe completa pódese ler de balde na web da revista.
Os medios de comunicación galegos prestaron ampla atención á Festa do Requeixo da Capela, que tivo lugar o pasado domingo 30 de agosto.
Previamente Radio Voz emitiu en directo o Concurso de Receitas con Requeixo, que tivo lugar o venres 28 e do que deu boa conta La Voz de Galicia, xornal que tamén se fixo eco da Festa.
Diario de Ferrol levou de maneira destacada o éxito da festa á portada da edición do día 31 de agosto, e ata webs especializadas en maquinaria, como Tractor Galicia, se fixeron eco da mesma.
As emisoras de radio e televisión da comarca estiveron presentes na Festa e aproveitaron para facer diversas entrevistas aos seus protagonistas.
A Capela, 30 de agosto de 2009
“Eu veño de aquí detrás. Pegan vostedes un chimpo, pasan por derriba do Forgoselo, sobre as minas das Pontes, o Xistral e o Cadramón e xa están no Valadouro, onde de neno moitas veces axudei a miña mai a colgar o saqueto do leite callado que ao día seguinte se convertería nun delicioso requeixo. Son pouco máis de 40 quilómetros en liña recta, inda que por estrada se multipliquen e precisemos preto de dúas horas para chegar alí.
O requeixo segue a ser un dos grandes postres do país. Son palabras de Alvaro Cunqueiro e coas que comeza o apartado dedicado a este produto no seu libro A Cociña Galega, escrito hai máis de 30 anos, e no que Cunqueiro, como moitos veciños da Capela, fala de requesón e non requeixo. (más…)
Un día de sol radiante, un dos mellores de todo o verán, permitiu que a Festa do Requeixo de A Capela se celebrara con gran éxito este 30 de agosto. Unha estupenda maneira de despedir as vacacións para todos os que ao día seguinte volvían ao traballo.
Este ano a festa acadaba a súa edición número 21, que a converte na festa do requeixo máis antiga de Galicia.
Máis de 2.500 quilos de requeixo da Cooperativa Campo Capela se venderon no transcurso do día, a un prezo de 1,50 euros a tarrina de 250 gramos, e co agasallo dunha mostra de mel da zona para aqueles que prefiren o requeixo con mel.
A música non faltou en todo o día, con actuacións de Leilía e banda, o trío Vaamonde, Lamas e Romero, a Xove Banda de Gaitas de Narón e a Banda de Gaitas Basilio Carril. As Cantareiras de Ardebullo puxeron o humor.
Este ano o pregón correu por conta do xornalista e escritor gastronómico Miguel Vila.
O xornal La Voz de Galicia faise eco hoxe da demanda da Cooperativa da Capela para que o requeixo sexa oficialmente considerado como unha variedade máis de queixo e reciba o trato que lle corresponde por parte da administración, xa que dous anos despois de que se iniciasen os trámites ante a Xunta de Galicia non se recibiu ningunha resposta da mesma.
A información pódese ler completa na web do xornal.
A presentación do libro “Receitas con requeixo” realizouse hoxe nas instalacións da Cooperativa Campo Capela, con presenza de numerosos socios e autores de receitas. Para o acto contamos coa asistencia do Presidente da Deputación Provincial da Coruña, Salvador Fernández Moreda, que se declarou partidario do requeixo de A Capela sen máis engadido que un pouco de azucre.
Na presentación tamén participaron o Alcalde de A Capela, Ángel López Sueiro, a Presidenta da Cooperativa, Manuela Permuy, e o coordinador do libro, o xornalista e escritor gastronómico Miguel Vila.
Tódolos autores de receitas participantes no libro recibiron un diploma acreditativo.
Ao remate do acto serviuse un viño acompañado de petiscos elaborados con produtos da Cooperativa.
Foto: www.dicoruna.es
Dúas das principais webs gastronómicas do país, Galicia Gastronómica (do grupo do xornal lucense El Progreso) e Vigo Gastronómico, recollen hoxe ampla información sobre a presentación do libro “Receitas con requeixo” e a presentación que terá lugar hoxe na sede da Cooperativa.
Gestionado con WordPress